صيام الحامل في رمضان

هذا المقال عبارة عن سؤال و إجابة من استشاري نساء وتوليد د/ لمياء العصامي عن صيام الحامل في رمضان و أشهر 7 حالات ممنوع عنهم الصيام تماما .

   خلينا نبتدى بأول و اهم سؤال .. اصوم و لا لا ..

علشان تقدرى تاخدى قرار في الموضوع ده لازم تعرفى ايه اللى بيحصل في جسمك بيكون في الحمل هرموناتك بتتغير وهرمون البروجسترون بيزيد جدا و ده من رحمه ربنا بينا لان زياته بتقلل انقباضات الرحم و ده بيخليه ثابت و الجنين يقدر ينمو جواه بسهوله بدون ميحصل اجهاض 

هرمون البروجسترون ده بياثر على جسمك كله مش على رحمك بس و من ضمن الحاجات اللى بتتاثر خلال فتره الحمل جهازك الهضمى اللى بيحصل فيه كسل بياثر على الهضم .و ده بيخلى عندك اعراض زى اعراض القولون مش مرتاحه من اقل كميه اكل بتاكليها  ده غير انه بياثر على الصمام اللى موجود بين المعده و المرئ و يخليه عكس الطبيعى يفتح شويه و بيخلى عندك حموضه معظم الوقت و مراره في الفم  و حرقان في صدرك  و علشان نقدر نتغلب على المشكله ديه في العادى بنخلى الحامل تاكل وجبات صغيره كل ساعتين تلاته .. دخلى معدتك حاجه صغيره مفيده من الاكل اللى هنقول عليه كمان شويه ..

السؤال هنا .. هل هينفع تصومى و انتى عندك كل الحاجات ديه  .. و لا مش هينفع ؟؟

في الأول لازم تبقى عارفه ان البيبى مش مستنى انك تاكلى علشان ياخد الغذا بتاعه  احتياجاته هتروحله بانتظام عن طريق المشيمه حتى لو انتى مكلتيش نتى اللى هتتعبى  في ال 9 شهور بتوع الحمل بيتقسموا 
لـ3 مراحل  كل 3 شهور مرحله 

– اولـ3 شهور في الحمل او زى مبنسمه الفرست ترايمنستر  الصوم بيبقى صعب  بسبب القيء و الغثيان و لسه جسمك مش متعود على  تغير الهرمونات  و ضغطك بيبقى واطى في الفتره ديه 

– الـ3 شهور اللى في النص او الميدل ترايمنستر بيبقوا اكتر 3 شهور امان في الحمل و اى حاجه عايزه تعمليها بننصح بيها في الشهور ديه 

– اخر 3 شهور لو صحتك كويسه و حملك سليم ممكن تصومى ولو حسيتى في اى وقت انك تعبانه و مش قادره تكملى صيام  يبقي لا يكلف الله نفسا الا وسعها   و انتى معاكى رخصه انك تفطرى و افتكرى ان الله يحب ان تؤتى رخصه ..

طبعا في اختلافات كتيره بينا .. الموضوع كله مرتبط بشكل الحمل بتاعك .. حسب الاعراض اللى عندك في الحمل و طبيعه المجهود اللى بتبذليه .. تقدرى تاخدى قرار بانك تصومى او لا .. بس ف حالات مش بمزاجك .. لازم تفطرى .. ايه الحالات ديه ؟؟ 

الحالات اللى مينفعش طبيا انها تصوم:

1- لو واحده جالها سكر حمل  او داخله الحمل و عندها سكر الست ديه لازم تاخد ادويتها بشكل منتظم ده غير ان مستوى السكر في الدم بيقى صعب نعمل عليه كونترول في الصيام و بنخاف يحصلها هبوط نتيجه لهبوط مستوى السكر في الدم. و ده اخطر من ارتفاع السكر فديه بيبقى صعب انها تصوم ..

2-  اللى ضغطها عالى او عندها تسمم حمل .. يعنى ضغطها عالى و عندها نسبه زلال في البول .. ديه برضه بتبقى مرتبطه بادويه معينه بتاخدها في مواعيد ثابته .. وده غير انها بتشتكى من صداع و الم في المعده .. زغلله في العنين .. كل الاعراض ديه بيبقى صعب اننا نزود عليها صعوبات الصيام كمان ..

3- لو الحامل عندها القلب او عندها الغده .. ديه القرار فيها بيبقى مع دكتورالباطنه اللى هي متابعه سواء في صيامها او حملها من أساسه و مننصحهاش طبعا بالصيام ..

4- لو الحامل عندها مشاكل في البول .. زى حرقان في البول او لونه بقى غامق ديه لازم تفطر على طول و تشرب سوائل كتير .. مشاكل البول لوحدها بتكتر في الست الحامل و الصيام ممكن يزود المشاكل ديه ..

5- لو واحده حامل في توأم .. ديه صعب جدا انها تصوم .. لان كل حاجه عندها بتبقى اكتر من العادى .. صعوبه التنفس .. كسل الأمعاء .. صعوبه التنفس .. الحموضه .. الضغط على الكلى .. في بتبقى محتاجه رعايه افضل ..

6- لحامل مينفعش تصوم برضه .. لو حركه الجنين عندها قليله .. الطبيعى انه يتحرك 10 حركات في 12 ساعه .. الصيام لوحده بيقلل حركه الجنين .. فكده احنا مش هنبقى عارفين هل حركه الجنين قليله نتيجه للصيام و لا نتيجه لمشكله في المشيمه بتخليها مش بتدخل الغذا الكافى للجنين .. فبالتالى لا ينصح انها تصوم .. ديه بنقولها كلى و نامى على جمبك الشمال و تابعى حركه الجنين و شوفى هيتحرك و لا لا ..

7- كمان لو واحده وزن الجنين عندها قليل او الميه كتيره حوالين الجنين .. او الميه قليله حوالين الجنين .. ده بنسميه حمل عالى الخطوره و بيحتاج متابعه دقيقه و بتمشى على ادويه معينه ..

و بكده نكون غطينا اهم الحالات اللى مينفعش ان الحامل تصوم فيها طبيا .. و بنعيد تانى .. معاكى رخصه انك تفطرى و تبقى تعوضي الأيام ديه لما تقومى بالسلامه ..